തെരുവില്‍ കണ്ട
കാഴ്ചകള്‍ പതിയെ
നിറങ്ങളില്‍ മുങ്ങി
നിവര്‍ന്ന്
കടലാസുകളില്‍
നിന്നും പ്രദര്‍ശന ശാലയിലെ
ഭിത്തിയിലേക്ക്
നടന്നു കയറി
മിനുത്ത
മുഖവുമായെത്തിയവര്‍
ഭിത്തികളില്‍ തൂങ്ങിയ
ഒട്ടിയ കുഞ്ഞു വയറിന്‍
അസ്ഥി പാടുകള്‍
എണ്ണി തിട്ടപെടുത്തി .
പിഞ്ചി നിറംകെട്ടു
ബ്ലൌസ്സിനുള്ളില്‍
ഉടഞ്ഞു തൂങ്ങിയ
മുലകളെ മാന്യനുടുപ്പിട്ട
കണ്ണുകള്‍
കൊത്തി വലിച്ചു .
നോട്ടുകളെണ്ണിയേറിഞ്ഞ്
ചിത്രങ്ങള്‍ കാറിലടുക്കുമ്പോള്‍
നീട്ടിയ പിച്ചചട്ടിയുമായി
വന്നു കെഞ്ചി പാടുന്നു
വാങ്ങിയ ചിത്രത്തിന്‍
നിറമില്ലാത്തൊരു കോലം
ആട്ടിയകറ്റി പായുമ്പോള്‍
കാറിന്‍ സീറ്റിലിരുന്നു
അലറി വിളിച്ചു കരയുന്നു
തെരുവില്‍ നിന്ന്
കടലാസ്സില്‍ പടര്‍ന്ന
കോലങ്ങള്‍ ..
No comments:
Post a Comment